Վրաստանի վարչապետը հայտարարել է, թե Թբիլիսին մտադիր չէ չեղարկել վերջին ամիսներին ընդունված վիճահարույց օրենքները՝ չնայած Արևմուտքի շարունակական հորդորներին։
Ավելի վաղ «Ազատությանը» հայտնի էր դարձել, որ Եվրամիությունը զգուշացրել է Վրաստանի իշխանություններին, թե Բրյուսելի կողմից առաջ քաշված մի շարք պայմանները չկատարելու, այդ թվում՝ օտարերկրյա գործակալների մասին օրենքը չչեղարկելու, բողոքի ակցիաների դատապարտված մասնակիցներին ազատ չարձակելու դեպքում Վրաստանն առաջիկա հոկտեմբերից արդեն կարող է զրկվել ԵՄ երկրների հետ ազատ վիզային ռեժիմից:
«Երբ ձեզ ասում են, որ չպետք է ընդունեք օրենք, որը թույլ չի տալիս օտարերկրյա ուժերին երկրում հեղափոխություն կազմակերպել, դա նշանակում է, որ ձեզ սպառնում է կայունության և խաղաղության կորուստ։ Եթե հարցը դրվի այսպես՝ կա՛մ խաղաղություն և կայունություն, կա՛մ վիզա և ազատականացում, իհարկե, մենք նախապատվությունը կտանք խաղաղությանը և կայունությանը», - հայտարարել է վարչապետ Իրակլի Կոբախիձեն՝ Եվրահանձնաժողովի պահանջները որակելով որպես շանտաժ։